DÉI MÉI PRAKTESCH INFORMATIOUNE KRITT DIR, NODEEMS DIR ÄR TICKETE GEBUCHT HUTT.
D'PERFORMANCE GËTT OCH OP FRANSÉISCH AN OP ENGLESCH OPGEFOUERT.

Erlieft eng immersiv an eenzegaarteg Performance: eng theatralesch Visitt vum Shopping Center Belle Etoile!

Inspiréiert vun touristesche Féierungen duerch archeologesch Sitten, proposéiert L'Âge d'or Visitt Guidéë vu Banken, Büroen an Akafszenteren – vu Strukturen déi seelen iwwert hir funktionell Dimensioun eraus betruecht ginn. Fir dës Nei-Inzenéierung vum Stéck zu Lëtzebuerg schaffen de Schwäizer Kënschtler-Duo Igor Cardellini a Tomas Gonzalez mat der Schauspillerin Frédérique Colling zesummen. Mat enger Grëtz Humor entschlëssele si d'Idealer vun der amerikanescher Mall, an där Reliquien aus der Vergaangenheet mat der Realitéit vun eiser haiteger Gesellschaft zesummeliewen.

Wärend engem gemitterlechen Trëppeltour duerch d'Belle Etoile gëtt de Public mat Kopfhörer ekipéiert an agelueden d'Kulissen, d'Geschicht an d'Erausfuerderunge vun dësem groussherzoglechen Tempel vun der Consommatioun ze erfuerschen. L'Âge d'or ass méi ewéi eng einfach Promenad: et ass eng sensibel an decaléiert Experienz, déi probéiert erauszefannen, wéi des Architektur vum grousse Commerce op eis awierkt.